ඉන්දු - බංග්ලාදේශ ගැටුම යොවුන් ලෝක කුසලානයටත්

ඉන්දියාව සහ බංග්ලාදේශය අතර පවතින දේශපාලන සහ ක්‍රිකට් විරසකය මේ වන විට සිම්බාබ්වේ සහ නැමීබියාවේ පැවැත්වෙන 19න් පහළ ලෝක කුසලාන ක්‍රිකට් තරගාවලිය දක්වා ද ව්‍යාප්ත වී තිබේ.

අද (ජනවාරි 17) සිම්බාබ්වේහි බුලවායෝ (Bulawayo) නුවරදී පැවැත්වෙන මූලික වටයේ 'B' කාණ්ඩයේ තරගයේදී දෙරටේ නායකයන් අතර ඇති වූ සිදුවීමක් මේ වන විට දැඩි අවධානයට ලක්ව ඇත.

තරගයේ කාසියේ වාසිය උරගා බැලීම සඳහා ඉන්දීය නායක ආයුෂ් මාත්‍රේ (Ayush Mhatre) සහ බංග්ලාදේශ වැඩබලන නායක සවාද් අබ්රාර් (Zawad Abrar) පිටියට පිවිසි අතර, එහිදී ඔවුන් සම්ප්‍රදායිකව සිදු කරනු ලබන අතට අත දීමෙන් (Customary Handshake) වැළකී සිටීමට පියවර ගත්හ. කාසියේ වාසිය දිනූ බංග්ලාදේශ කණ්ඩායම ප්‍රථමයෙන් පන්දු රැකීමට තීරණය කළ අතර, අනතුරුව දෙරටේ නායකයන් කිසිදු සුහදතාවයකින් තොරව පිටියෙන් ඉවත්ව ගොස් තිබේ.

ඉන්දියාව සහ පාකිස්ථානය අතර පවතින උණුසුම් ක්‍රිකට් සබඳතාවයට සමාන තත්ත්වයක් මේ වන විට ඉන්දියාව සහ බංග්ලාදේශය අතර ද නිර්මාණය වී ඇති බව ක්‍රීඩා විචාරකයෝ පවසති. මෙයට ප්‍රධාන වශයෙන් හේතු වී ඇත්තේ:

•  බංග්ලාදේශයේ ඇති වූ දේශපාලන පෙරළියත් සමඟ දෙරට අතර සබඳතා පළුදු වීම.

•  ඉන්දීය ප්‍රිමියර් ලීග් (IPL) තරගාවලිය සඳහා බංග්ලාදේශ ක්‍රීඩක මුස්තාෆිසුර් රහ්මාන්ගේ සහභාගීත්වය සම්බන්ධයෙන් ඇති වූ ගැටලුව.

•  ආරක්ෂක හේතූන් මත ඉන්දියාවේ පැවැත්වෙන විස්සයි-20 ලෝක කුසලාන තරග සඳහා සහභාගී වීමට බංග්ලාදේශය දක්වන අකමැත්ත.

ඉන්දියාව මීට පෙර පාකිස්ථානය සමඟ පැවති තරගවලදී ද මෙලෙස "අතට අත නොදීමේ" ප්‍රතිපත්තියක් අනුගමනය කළ අතර, එය දැන් බංග්ලාදේශය දක්වා ද ව්‍යාප්ත වී තිබීම ක්‍රිකට් ලෝකයේ දැඩි කතාබහට ලක්වී ඇති කරුණකි.