2026 වසරේ පැවැත්වීමට නියමිත විස්සයි-20 ලෝක කුසලාන ක්රිකට් තරගාවලිය සඳහා බංග්ලාදේශ කණ්ඩායමේ සහභාගිත්වය සහ ඔවුන් ඉන්දියාව බලා පිටත්ව යන්නේද යන්න පිළිබඳ අවසන් තීරණය අනිද්දා (21) දිනට පෙර ලබාගැනීමට නියමිතව තිබේ.
පසුගිය සෙනසුරාදා ඩකා නුවරදී පැවැති විශේෂ සාකච්ඡාවකදී, අන්තර්ජාතික ක්රිකට් කවුන්සිලය (ICC) විසින් බංග්ලාදේශ ක්රිකට් පාලක මණ්ඩලය වෙත මෙම අවසන් දිනය දැනුම් දී ඇති බව වාර්තා වේ. බංග්ලාදේශයේ පවතින දේශපාලනික හෝ ආරක්ෂක තත්ත්වයන් මත පදනම්ව ඔවුන් මෙම තීරණය ගැනීමට නියමිත බව පෙනෙන්නට තිබේ.
බංග්ලාදේශ ක්රිකට් පාලක මණ්ඩලය විසින් සිය කණ්ඩායමට ඉන්දියාව බලා පිටත්ව යාමට අවසර ලබාදීම ප්රතික්ෂේප කළහොත්, එම අඩුව පිරවීම සඳහා ආදේශක කණ්ඩායමක් නම් කිරීමට ICC ආයතනයට සිදුවනු ඇත.
වත්මන් ශ්රේණිගත කිරීම් අනුව බංග්ලාදේශය වෙනුවට ස්කොට්ලන්ත කණ්ඩායම ලෝක කුසලානයට සුදුසුකම් ලැබීමට වැඩි ඉඩකඩක් පවතින බව සඳහන් වේ.
මෙම තීරණය මත 2026 ලෝක කුසලාන තරගාවලියේ මූලික වටයේ කාණ්ඩ බෙදීම්වල ද සංශෝධන සිදුවිය හැකිය.
Social Plugin