ඉතිහාසයේ පළමුවරට ඉතාලියට ක්‍රිකට් ලෝක කුසලාන වරම් හිමිවෙයි


2026 වසරේ ශ්‍රී ලංකාවේ සහ ඉන්දියාවේ සම සත්කාරකත්වය යටතේ පැවැත්වෙන පිරිමි විස්සයි20 ලෝක කුසලානයට සුදුසුකම් ලබාගැනීමට ඉතාලියට පෙරේදා (11) හැකිවිය.

ඔවුන් සිය ක්‍රිකට් දිවියේ ලෝක කුසලාන තරගායවලියකට සුදුසුකම් ලැබූ පළමු අවස්ථාව මෙයයි.

2007 වසරේ දී ආරම්භ වූ ICC පිරිමි T20 ලෝක කුසලානයේ මේ දක්වා කාලය තුළ රටවල් 24ක් අවම වශයෙන් එක් අදියරකට හෝ සහභාගී වී තිබේ.

ඒ අනුව එම රටවල් අතරට එක් වූ 25වන රට බවට ඉතාලිය පත්විය.

එමෙන්ම එංගලන්තය, අයර්ලන්තය, නෙදර්ලන්තය හා  ස්කොට්ලන්තයෙන් පසු ලෝක කුසලාන තරගාවලියක් ක්‍රීඩාකරන 5වන යුරෝපානු රට බවටද ඉතාලිය පත්වනු ඇත.

එළැඹෙන ලෝක කුසලානය වෙනුවෙන් පැවති යුරෝපීය සුදුසුකම් ලබාගැනීමේ තරගාවලියේ ප්‍රසාද ලකුණු සටහනේ දෙවැනි ස්ථානය හිමිකරගැනීමත් සමග ඔවුන්ට මෙම අවස්ථාව හිමිවිය.